تفسير سورة المائدة، الآية 95

اور اللہ عز و جل کا ارشادِ گرامی ہے: (يَا أَيُّهَا الَّذِينَ آمَنُوا لَا تَقْتُلُوا الصَّيْدَ وَأَنْتُمْ حُرُمٌ … ۝٩٥ (اے ایمان والو! تم حالتِ احرام میں شکار مت مارو...)، یعنی اس حال میں کہ تم احرام باندھے ہوئے ہو۔ یہ آیتِ مبارکہ اپنے ظاہری مفہوم کے اعتبار سے ہر قسم کے شکار کو قتل کرنے کی ممانعت میں عام ہے، پھر رسول اللہ صلی اللہ علیہ وسلم نے چند اشیاء کے بارے میں رخصت عنایت فرمائی اور انہیں مار ڈالنے کی اجازت دی، چنانچہ آپ صلی اللہ علیہ وسلم نے ارشاد فرمایا: "خَمسٌ مِنَ الدوَاب لَا جُنَاحَ عَلَى مَنْ قَتَلَهُنَّ وَهُوَ مُحْرِمٌ في الحرَمِ: الحِدَأَةُ، والغُرَابُ، والعَقْرَبُ، والفَأرَةُ، وَالْكَلْبُ العَقُورُ" (جانوروں میں سے پانچ ایسے ہیں کہ جو شخص حالتِ احرام میں حرم کے اندر انہیں مار ڈالے اس پر کوئی گناہ نہیں: چیل، کوا، بچھو، چوہیا، اور کاٹ کھانے والا کتا)۔

اور حضرت عائشہ رضی اللہ عنہا سے مروی ہے، وہ فرماتی ہیں کہ: "أمر رسول اللَّه صلى الله عليه وسلم بقتل خمس فواسق في الحل والحرم: الحدأة، والغراب، والفأرة، والعقرب، والكلب العقور" (رسول اللہ صلی اللہ علیہ وسلم نے حل اور حرم میں پانچ موذی جانوروں کو مار ڈالنے کا حکم دیا: چیل، کوا، چوہیا، بچھو، اور کاٹ کھانے والا کتا)۔